12 Ago MEDIOS DE COMUNICACIÓN

MEDIOS DE COMUNICACIÓN

Los medios de comunicación son la ferramienta perfecta para tener poder. N’una democracia son más importantes que’l poder financieru, yá que son los que remanen la opinión de la xente, polo tanto, el sofitu social, dexando a los partíos corruptos llegar y caltenese nel poder.

La gran mayoría son privaos, propiedá de los grandes grupos financieros, cola banca y les eléctriques a la cabeza, controlando y manipoliando la información, criminalizando a les persones o colectivos que nun asumen les sos polítiques económiques neolliberales.

Estos medios de comunicación tán fuertemente financiaos polos partíos políticos al traviés de subvenciones y propaganda institucional. Son privaos, pero estos partíos corruptos mantienenlos con dineru público, que de la mesma, estos medios los promocionen.

Esos grandes grupos financieros, ponen a disposición de cada partíu esos grupos mediáticos de comunicación. Cada partíu tien los sos medios, siendo los de la derecha los más numberosos.

Los medios de comunicación públicos, que tienen que tar al serviciu del pueblu, tienen el mesmu comportamientu que los privaos, controlándolos  el partíu políticu que gobierne nesi momentu la Institución, según los sos intereses, frutu de la enorme corrupción política.

Los medios de comunicación son formadores d’opinión pública. El 80% de lo qu’opina la xente débese a ellos, una y bones  la gran parte de la población nun piensa por sí mesma, si non, que lo dan pensáu los medios de comunicación, según los sos intereses.

Tamos bien manipulaos per esos medios, el Nacionalismu Asturianu tenemos que curiar muncho el llinguaxe, la imaxen y los fechos, un mala actuación pue tiramos enbaxo el trabayu de muncha xente durante munchos años.

Cuando entremos nes Instituciones vamos trabayar fuerte per una parte:

Pa amenorgar a lo máximo posible la propaganda Institucional. Una Institución Pública nunca se tien qu’espublizar.

En casu que se tenga qu’espublizar daqué que sía de ínterés públicu, d’esa publicidá queden escluyíos aquellos medios que manipolien, falten, acosen, aburuyen la realidá, y tengan un comportamientu nada éticu.

Por otra, por un control xurídicu sobro l’usu de los medios de comunicación pa defender la Democracia.

Esi control xurídicu consiste en faer una llei que penalice la mentira, el llevantu, la falsedá, la manipulación, l’insultu, l’odiu, l’acoso, la distorsión de la realidá.

Que dexe l’accesu a toes les tendencies ya iniciatives polítiques democrátiques, una y bones, los medios de comunicación ocupen un espaciu políticu bien importante, que los grandes grupos financieros y empresariales tán controlando col sofitu de los partíos políticos, cerrando’l pasu a iniciatives contraries al so modelu políticu y económicu neolliberal.

ENSAME SOCIALISTA ASTUR

(Estaya Política)