¿QUIÉN SOMOS?

 

Somos un partiu políticu, Nacionalista Asturianu, Democráticu, Republicanu y Socialista, fundáu nel añu 2003, estructuráu dafechu, con un bon trabayu desarrolláu pa los próximos años. Entamáu por xente que dempués de llevar munchos años militando en partíos nacionalistes y nun tener consiguío nada, tuviemos qu´entamar de cero, dando un enfoque diferente. 

 

Queremos Asturies y sentimosla como Nación. El proyectu nun ye independentista. Eso ye daqué qu’el pueblu nun entiende, nin ta preparáu pa ello, nin lu tará nes proximes xeneraciones.

 

El plantegar eso agora, cuando nin siquier tamos nes Instituciones, ye cometer los mesmos erros anteriores, restandonos munchísimo sofitu social. Ciérrasenos la puerta pa siempres pa entrar n’elles. Si dalgun día diérense -yos condiciones, abriríamos l’alderique.

 

El proyectu políticu nun tien compromisu con nenguna ideoloxía, que nos faiga ser dogmáticos a la hora de plantegar los problemes de Asturies. Tratamos de dar solución a los problemes  buscando’l bien social. 

 

Nel momentu que se tenga compromisu con dalguna ideoloxía, yá non se ye llibre pa tratar los problemes de Asturies. Siempres se tará condicionau pola ideoloxía. Nunca se van resolver los problemes d’una manera real. 

 

Otra cosa distinta, ye que dellos militantes tengan ideoloxía, pero nunca aplicada al proyectu políticu.

 

El Nacionalismu Asturianu entamó fai dalgo más de 43 años con xente mozo, ensin esperiencia. Nun supimos crear infraestructura (presencia activa nos movimientos sociales y culturales non marxinales, sindicatu nacionalista, medios de comunicación, fontes de financiación, etc) que mos ficiera algamar sofitu social.

 

Cayimos na marxinalidá y la radicalidá. Los erros, traiciones, guerra puerca, provocó un fracasu nos proyectos. Too eso llevómos al aislamientu social, lo que mos distanció de les Instituciones. Quemóse munchísima xente mui válido, que dexo´l proyeutu al nun ver futuru, dempués de munchos años perdíos de militancia.

 

L`oxetivu principal del nuestru proyeutu ye entrar nes Instituciones, pa poder trabayar por nuesu Pueblu. Les coses camúdense dende les Instituciones, fuera d´elles, non esistimos, vamos ser marxinales como hasta agora, quemar a muncha xente mui válido y acabar desapaeciendo.

 

Los partíos políticos que nos tan gobernando, déxennos mui pocu espaciu pa entrar nes Instituciones y mui pocu  marxe pa cometer errores; son mui fuertes, contrólenlo too.

 

Estos partíos y sindicatos controlen tol espaciu políticu y social Asturianu, tán  fuertemente financiaos, tienen tolos medios de comunicación al so algame (recordái que`l 90 % de lo que piensa la xente débese a los medios de comunicación) polo que competir con ellos neses condiciones ye perdifícil; hai que tener el proyectu bien desenvueltu, los oxetivos mui claros y  nun cometer erros.

 

Vei documentu Control Político

 

El trabayu que tenemos por delantre ye bien importante  y comprometío, eso nun significa que seya marxinal nin radical, sinón, consecuente cola situación política, social y cultural de despreciu que tamos viviendo y a la vez coneutando col  Pueblu.

 

Trabayamos en toles estayes (política, social, económica, cultural, llaboral, ecolóxica, sindical). Somos pocos, el trabayu ye muncho. Esperamos cuntar con más xente comprometíu col nuesu proyectu.

 

EL TRABAYU BASÁMOSLO  EN TRES PARTES

 

 1- Una parte política

 

Agora mesmo, por un Estatutu nes mesmes condiciones qu´otres nacionalidaes, como Cataluña, Euskadi .

 

2- Una parte social

 

El desarrollu del Estáu del Bienestar fuertermente amenazáu (educación, sanidá, vivienda, servicios sociales, rellaciones llaborales) too eso nun entornu medioambiental saludable.

 

El partíu tien desenvueltos y trabayaos toos eses temes qu’afecten Asturies. Tenemoslos desemvueltos d’una manera real, ensin interferencies ideolóxiques, buscando’l bien social.

 

Temes sociales (orde públicu dende lo público, solución al problema social de la droga, nueva llei d’extranxería). Llaborales (acabar colos abusos llaborales, recuperar pa lo público toles empreses y servicios que se privatizaron). Control del llobu. Desenvolvimientu del estáu del bienestar (sanidá, vivienda, educación, servicios sociales públicos). Potenciar y protexer la nuesa cultura. Sofitu a los ganaderos y llabradores. Protección del mediu ambiente (acabar colos  parques eólicos especulativos, protección del espaciu natural pa que nun puedan esplotar la mina d’oru de Salave y munchos temes más.

 

El desarrollu d´un socialismu democráticu, onde convivan un sector públicu fuerte, con un sector priváu non especulativu, que xenere riqueza pa Asturires.

 

Crear infraestructura (sindicatu nacionalista, presencia activa nos movimientos sociales non marxinales  y culturales, medios de comunicación, fontes de financiación) que mos faiga llegar a la xente y algamar sofitos.

 

3- Una parte cultural

 

Potenciar la nuesa cultura (Idioma oficial, arte, educación, lliteratura, música, tradiciones, creencies etc), que son los rasgos fundamentales que definen la nuesa identidá como pueblu.

 

La cultura ye un elementu de xunión social, cuanto más fuerte y rica ye la cultura d´un pueblu, más fuerte y xuníu ta y más dificil ye desanicialu.

 

Vei campaña a favor de la nuesa cultura

 

Nunca mos presentemos a les eleiciones, esperamos facelo cuando haya mas xente comprometíu col nuesu proyectu que garantice sofitu social.

 

ENSAME SOCIALISTA ASTUR